#KOMMENTAKERFIÐ

Stórfyndið og einfalt spil fyrir 3-10. Hver spilari fær 10 „komment“ á hendi. Í hverri umferð er einn ritstjóri sem leggur út „fyrirsögn“. Hinir spilararnir leggja síðan „komment“ í púkkið. Ritstjórinn velur kommentið sem honum þótti skemmtilegast í samhenginu og spilarinn sem lagði það út fær stig.

Hugmyndin kviknaði þegar mistókst að finna leið til að þýða hið stórfyndna spil Cards Against Humanity. Það bara virkar ekki sérstaklega vel á íslensku. Í kjölfarið kviknaði sú hugmynd að nota grunnkerfið sem Cards (ásamt mörgum öðrum spilum) byggir á og setja það upp sem kommentakerfi á netmiðli. Prufuspilun staðfesti að þetta yrði líklega fyndnasta spil sem hefur verið búið til á íslensku.

Í spilinu eru tvenns konar spjöld: 320 kommentaspjöld og 80 fyrirsagnaspjöld. Langflest kommentin eru byggð á raunverulegum athugasemdum frá íslenskum netverjum. Þannig fær maður þá raunveruleikatilfinningu sem fylgir óstjórnlegri reiði, stafsetningarvillum og handahófskenndri notkun á greinarmerkjum. Þó er rétt að nefna að jafnvel eðlilegustu athugasemdir geta orðið stórfyndnar þegar þær eru settar í rangt samhengi.

Spilið hentar 13 ára og eldri, það inniheldur nokkuð af dónalegum orðum sem flest grunnskólabörn þekkja.

Það tekur varla nema svona tvær mínútur að læra spilið og síðan getur skemmtunin hafist!